[1]
З 4 па 6 верасня ў Навагрудку (Гродзенская дыяцэзія) адбудуцца рэкалекцыі пакаяння за Беларусь. Духоўныя практыкаванні, натхнёныя Фацімскім пасланнем, запрашаюць святароў, манаскіх асоб і ўсіх вернікаў да супольнай экспіяцыі.
Натхненнем для адмысловых духоўных практыкаванняў, што ладзяцца ўжо ў чацвёрты раз, сталі фацімскія аб’яўленні Маці Божай, якая ў неспакойны для свету час вайны і рэвалюцый заклікала людзей да пакаяння і навяртання.
У праграме рэкалекцый пакаяння, якія арганізуюцца пры парафіі святога Міхала Арханёла ў Навагрудку, будуць дзве ўсяночныя адарацыі, некалькі канферэнцый, пілігрымка пакаяння да Маці Божай Новага Жыцця ва Уселюб, Крыжовы шлях і іншыя пакутныя набажэнствы.
Месца правядзення: г. Навагрудак, вул. Міцкевіча 1, рэкалекцыйны дом пры парафіі святога Міхала Арханёла.
Кантактны тэлефон для запісу і дадатковай інфармацыі: +375 (44) 771 99 83 [2] — Марына
Праграма рэкалекцый (магчымы невялікія змены)
Пятніца, 4 верасня
18.00 – святая Імша
19.30 – вячэра
20.00 – канферэнцыя аб патрэбе экспіяцыі за грахі і нявернасці (малітва прыніжэння prostratio perfectа — тлумачэнне ў некалькіх словах)
21.00 – Крыжовы шлях пакаяння
23.30 – малітва прыніжэння, пачатак усяночнай адарацыі Найсвяцейшага Сакрамэнту
Субота, 5 верасня
8.00 – супольнае заканчэнне ўсяночнай адарацыі
8.30 – сняданак
10.00 – актуальнасць Фацімскага паслання адносна перапрашэння Богу за грахі і знявагі людскія
11.00 – Гадзінкі аб Беззаганным Зачацці Найсвяцейшай Панны Марыі
12.00 – Анёл Панскі, набажэнства да Маці Божай Нястомнай Дапамогі і Гадзінкі
12.30 – абед
13.30 – пілігрымка пакаяння ва Уселюб (магчымасць споведзі, вяночак да Божай Міласэрнасці, канферэнцыя пра Ружанец і яго моц, Святы Ружанец)
18.00 – святая Імша ў інтэнцыі вырашэння праблем у сем’ях і грамадстве
19.30 – вячэра
20.30 – супольная малітва ўдзячнасці і праслаўлення ў адарацыі Найсвяцейшага Сакрамэнту
22.00 – пакаянная працэсія вакол касцёла са свечкамі
23.00 – начная адарацыя Найсвяцейшага Сакрамэнту
Нядзеля, 6 верасня
7.30 – заканчэнне адарацыі
8.00 – сняданак
8.45 – канферэнцыя пра ўдзячнасць Богу
10.00 – святая Імша падзякі і заканчэнне
Удзельнікам рэкалекцый прапануецца:
- падчас рэкалекцый захоўваць пост на вадзе або на хлебе і вадзе (па жаданні і паводле магчымасці);
- скласці ахвяраванне на духоўныя мэты;
- добра падрыхтавацца да споведзі;
- абавязкова мець з сабой Біблію і ружанец.