[1]Сёлета ўрачыстасці Маці Божай Будслаўскай у Нацыянальным санктуарыі пройдуць 4 і 5 ліпеня. Пра асаблівасці сёлетняга фэсту распавёў Catholic.by яго галоўны арганізатар, пробашч парафіі Унебаўзяцця Найсвяцейшай Панны Марыі ў Будславе ксёндз Дзмітрый Дубовік.
Перадусім святар раіць усім, хто збіраецца ў гэтыя дні ў Будслаў, добра пазнаёміцца з праграмай сёлетняга фэсту [2], а таксама звярнуць увагу на важныя арганізацыйныя моманты.
- Пешыя пілігрымы будуць размяшчацца ў намётавым гарадку на полі каля вёскі Палессе, як звычайна.
- Тым, хто збіраецца на свята на ўласным аўтатранспарце, трэба ведаць, што машыну давядзецца пакінуць на паркоўцы і да Будслава ісці пешкі. З боку Крывічоў паркінг арганізуецца ў вёсцы Палессе, з боку Даўгінава — на ўездзе ў мястэчка, каля знаку «Будслаў».
- Для аўтобусаў і аўтамабіляў, нумары якіх былі загадзя перададзены арганізатарамі ў ДАІ, арганізаваны паркінг каля касцёла. Трапіць на яго можна толькі праз уезд у мястэчка з боку Крывічоў, праз вёску Палессе.
- Праход да касцёла адбываецца толькі праз пункты пропуску, дзе ўсе без выключэння праходзяць асабісты дагляд супрацоўнікамі служб бяспекі. Забараняецца праносіць з сабой колючыя і рэжучыя прадметы, піратэхніку, лёгкаўзгаральныя і іншыя небяспечныя рэчывы, прадукцыю ў шкляной і металічнай тары, алкагольныя напоі.
- Да цудадзейнага абраза Маці Божай Будслаўскай у галоўным алтары базылікі можна будзе падысці праз цэнтральны ўваход у касцёл, выхад — праз бочныя навы. Магчымасць памаліцца перад абразом у касцёле будзе на працягу ўсяго фэсту, у тым ліку і ўначы.
- Аднак катэгарычна забараняецца размяшчаць на падлозе ў святыні рэчы, раскладаць дыванкі і займаць праходы.
- Доступ за баляскі і ў стары касцёл цалкам закрыты.
- Малітоўныя інтэнцыі будуць запісвацца ў касцёле. Лепш загадзя падрыхтаваць запісаныя на лістку інтэнцыі і перадаць іх разам з ахвяраваннем адказным асобам у касцёле.
- Асвячоную ваду падчас фэсту ў Будславе можна будзе набраць у свой посуд за студняй і брамай з левага боку ад касцёла (на фота вышэй).
- Споведзь падчас фэсту будзе адбывацца як звычайна, у закрытых ад камароў намётах за плябаніяй.
- Ахвяраванні на патрэбы рамонту можна будзе пакінуць у касцёле.
У пятніцу 4 ліпеня ў Будславе для ўдзельнікаў фэсту дзейнічае дыспенсацыя (вызывленне) ад абавязку спажывання мясных страваў.
- Бясплатныя туалеты для ўдзельнікаў урачыстасці знаходзяцца з правага боку ад касцёла, за плябаніяй, а таксама далей, на полі каля паркоўкі аўтобусаў, за пунктам пропуску на вуліцы Чкалава.
- Падчас фэсту ў Будславе з высокай доляй верагоднасці будуць сур’ёзныя перабоі з мабільнай сувяззю і доступам у інтэрнэт аж да поўнай іх адсутнасці, што неабходна ўлічваць, плануючы сваё прабыванне.
Catholic.by [3]