[1]Сёлета свята Спаслання Духа Святога было па-асабліваму ўрачыстым, бо падчас святой Імшы адбыўся сакрамант канфірмацыі (бежмавання). У гэты дзень у святыні было мнагалюдна. 111 вернікаў з парафіі Адшукання Святога Крыжа і парафіі Святых Космы і Дам’яна, якія доўгі час рыхтаваліся да гэтага важнага кроку ў сваім жыцці былі благаслаўлёны і мірапамазаны ксяндзом біскупам Гродзенскай дыяцэзіі Уладзімірам Гуляем падчас святой Імшы, што распачалася ў нядзелю а дзявятай гадзіне.
У святочны дзень і сама Імша, і цырымонія бежмавання прайшлі велічна, прыгожа і грунтоўна. У храме на працягу ўсяго набажэнства гучаў цудоўны і ўзнёслы спеў. Здавалася, Дух Святы благаславіў вернікаў, бо падчас бежмавання праз вокны касцёла іх асвяціла яркае сонейка.
У сваім казанні біскуп Уладзімір заклікаў годна несці годнае сведчанне пра Хрыста ў асяроддзі. Іерарх нагадаў пра дары Святога Духа, менавіта пра сакрамант канфірмацыі, што гэта не рытуал, гэта моц Божая. Адзначыў, што некаторым не падабаецца насіць крыж і яны хаваюць яго, саромеюцца веры. Прыпомніў вернікам пра 2025 год, які праходзіць у Касцёле пад дэвізам “Пілігрымы надзеі”.
[2]
На завяршэнне прагучала шмат найлепшых пажаданняў і слоў удзячнасці ў адрас біскупа Уладзіміра Гуляя, за ўдзяленне сакраманту і гадавіны біскупскага пасвячэння. Цёплыя словы былі накіраваны і ў адрас ксяндза пробашча Юрыя Кузьміча, ксяндза каноніка Юзафа Багдзевіча, а таксама с. Марыны і с. Ірыны – якія рыхтавалі святыню да канфірмацыі і дапамагалі ўзрастаць у веры.
Дзякуем Богу за гэтую велічную ўрачыстасць і магчымасць праслаўляць Яго, а таксама за асаблівыя дары і ласкі, атрыманыя з Яго шчодрай рукі.
[3]
-
[4]
-
[5]
-
[6]
-
[7]
-
[8]
-
[1]
-
[9]
-
[2]
-
[10]
-
[11]
-
[3]
Вольга Заянчкоўская, тэкст
Дзмітрый Сакалоўскі, фота