[1]13–15 сакавіка 2026 года пры кляштары айцоў францішканаў канвентуальных у Івянцы пройдзе ўжо чацвёртая Майстэрня літургічнага спеву – сустрэча касцёльных музыкантаў і аматараў літургічнай музыкі, якія жадаюць удасканаліць сваё служэнне падчас Літургіі і паглыбіць яе перажыванне.
«Калі вы хацелі перажыць нешта глыбокае і прыгожае падчас Вялікага посту і чакалі знак – вось ён», – заахвочваюць арганізатары.
Сустрэча пройдзе 13–15 сакавіка 2026 года ў Івянцы (Валожынскі дэканат, Мінска-Магілёўская архідыяцэзія) пры францішканскім кляштары святога Антонія Падуанскага.
Па сваёй задуме Майстэрня літургічнага спеву ўяўляе сабой цыкл фармацыйных сустрэч для кантараў, удзельнікаў касцёльных хораў і ўсіх тых, хто праз спеў адкрывае прыгажосць і глыбіню літургіі, які прапануе магчымасць удасканаліць музычныя навыкі і літургічныя веды, узбагаціцца духоўна і быць у жывым кантакце з аднадумцамі.
«Праграма “міні-майстэрні» вельмі насычаная і прадугледжвае перадусім вакальна-харавыя рэпетыцыі і штодзённы ўдзел у святой Імшы.
Падчас сустрэчы пройдзе таксама духоўная канферэнцыя, кантарскі майстар-клас і адарацыя. Запланаваны і супольны вольны час», – паведамляюць арганізатары.
Да 6 сакавіка адкрыта рэгістрацыя ўдзельнікаў сустрэчы. Форма анлайн-заяўкі даступная па СПАСЫЛЦЫ >>> [2].
Умовы ўдзелу:
- Да ўдзелу запрашаюць ахвотных ва ўзросце ад 16 гадоў. Заяўкі ад людзей малодшага ўзросту будуць аўтаматычна ануляваныя.
- У сувязі з абмежаванай колькасцю месцаў удзел магчымы выключна пасля папярэдняй анлайн-рэгістрацыі і атрымання пацвярджэння з боку арганізатараў (на электронную пошту).
- Даезд да месца правядзення мерапрыемства і зваротную дарогу ўдзельнікі арганізуюць самастойна. Пажадана прыехаць у пятніцу 13 сакавіка да 19:30, у іншых выпадках неабходна скантактавацца з арганізатарамі (электронная пошта: muzmajsternia@yandex.by [3]; Instagram: @muzmajsternia [4]).
- Ад’езд можна планаваць у нядзелю 15 сакавіка пасля 14:00. У выпадку, калі разглядаецца даезд і ад’езд на грамадскім транспарце (маршрутцы), рэкамендавана паклапаціцца пра яго браніраванне загадзя, найлепш – адразу пасля атрымання пацвярджэння аб удзеле.
- Пражыванне і харчаванне ўдзельнікаў забяспечваюць арганізатары.
- Удзельнікі атрымаюць увесь неабходны нотны матэрыял на месцы. Рэкамендавана ўзяць з сабой цёплыя рэчы, спальнікі, алоўкі і нататнікі.
- Ахвяраванне на арганізацыйныя выдаткі складаецца ў дабравольным памеры.
-
[1]
-
[5]
-
[6]
Павел Бранавец, тэкст;
Фота: архіў Майстэрні літургічнага спеву, Марыям Джавад