[1]Гэта адбылося ў катэдральным касцёле Езуса Міласэрнага ў нядзелю, 23 красавіка, калі Касцёл адзначае свята Божай Міласэрнасці.
Спачатку ў 11.30 усе сабраліся на святочную Імшу, якую ўзначаліў біскуп Алег Буткевіч. У ёй таксама прынялі ўдзел Апостальскі візітатар для грэка-католікаў Беларусі архімандрыт Сяргей Гаек, пробашч парафіі Езуса Міласэрнага кс. Андрэй Аніскевіч, вікарый гэтай парафіі кс. Генадзь Рэйшаль, канцлер курыі дыяцэзіі кс. Віктар Місевіч і айцец Зміцер Грышан, пробашч грэка-каталіцкай парафіі ў Віцебску.
Слова да вернікаў прамовіў архімандрыт Сяргей Гаек. У ім іерарх паразважаў над крыніцай і значэннем Божай Міласэрнасці. Ён нагадаў, што да ўстанаўлення гэтага свята Беларусь мае асаблівае значэнне, бо святая Фаўстына Кавальская служыла Богу ў Вільні, нашай старажытнай сталіцы. А духоўнікам святой быў ураджэнец беларускай зямлі бласлаўлёны Міхал Сапоцька.
У сваёй гаміліі архімандрыт узгадаў і асобу біскупа Чэслава Сіповіча, які паходзіў з друйскай парафіі і быў апостальскім візітатарам для беларускіх грэка-католікаў. Ён прыклаў шмат намаганняў, каб у Ватыкане афіцыйна прызналі ўшанаванене Божай Міласэрнасці.
Адзначыўшы вялікі ўклад ураджэнцаў Беларусі ва ўстанаўлення свята Божай Міласэрнасці, іерарх нагадаў і аб вялікай адказнасці беларускіх вернікаў перад Богам, каб захаваць і перадаць наступным пакаленням гэты дар.
Закончылася Імша выстаўленнем Найсвяцейшага Сакраманту, супольнай малітвай да Божай Міласэрнасці і бласлаўленнем. Затым увесь касцёл праспяваў гімн “Цябе, Бога, праслаўляем”.
У 13.30 распачалася прэс-канферэнцыя, у якой прынялі ўдзел біскуп Алег Буткевіч, ксёндз Віктар Місевіч, прафесар Віктар Скарабагатаў, мастацкі кіраўнік творчага калектыву “Беларуская капэла” і Уладзімір Правілаў, сябра праўлення саюза музыкальных дзеячаў, а таксама журналісты з каталіцкіх і свецкіх сродкаў масавай інфармацыі.
Віктар Скарабагатаў і Уладзімір Прывалаў распавялі пра праект “Віцебскі арганны шлях”, які арганізаваны творчым калектывам “Беларуская капэла”, Віцебскім музычным таварыствам і Віцебскай дыяцэзіяй. Галоўным накірункам праекта стане прыцягненне ўвагі да арганаў Віцебшчыны як да гістарычных і матэрыяльных каштоўнасцяў.
На жаль, не ўсе арганы перажылі пераслед веры ў гады ваяўнічага атэізму, а тыя, што захаваліся, часта патрабуюць рамонту і рэстаўрацыі. Таму ў рамках праекта і плануецца экспедыцыя па касцёлах Віцебшчыны, каб выявіць такія інструменты.
Канцэрты арганнай і камернай музыкі будуць гучаць у касцёлах дыяцэзіі на працягу лета.
А першы канцэрт праекта адбыўся адразу пасля прэс-канферэнцыі ў 15 гадзін у катэдральным касцёле. За арганам быў выпускнік Беларускай акадэміі музыкі Віктар Кісцень, які зараз з’яўляецца арганістам касцёла Святой Тройцы ў Мінску, партыю мецца-сапрана выканала Наталля Акініна, салістка Нацыянальнага акадэмічнага Вялікага тэатра оперы і балета Рэспублікі Беларусь.
Усяго у праграме канцэрта было 12 нумароў. Вёў канцэрт заслужаны артыст Рэспублікі Беларусь Віктар Скарабагатаў. Кожны выступ артыстаў закончваўся апладысментамі гледачоў, а напрыканцы слухачы ўсталі і працяглай авацыяй падзякавалі артыстам.
Музыку нельга апісаць словамі, таму прапануем вам праслухаць некалькі нумароў канцэрта.
А нашым чытачам паведамляем, што наступны выступ з гэтага праекта адбудзецца 9 мая ў касцёле ў Дзеркаўшчыне.
Зміцер Лупач, тэкст і фота
Відэарэпартаж будзе пазней