У Рэчыцы адкрылася «Школа веры»

491a4a0327b47b32bd3778bab121ebe0_L22 красавіка ў рэчыцкай парафіі Найсвяцейшай Тройцы адкрылася «Школа веры» для моладзі і дарослых. У далейшым заняткі будуць праходзіць кожны панядзелак пасля Імшы ў 18.30. Весці «Школу веры» будуць пробашч парафіі айцец Аляксандр Драбышэўскі і катэхісты з гомельскай парафіі.

На сустрэчы запрашаюцца вернікі незалежна ад канфесіі і нават атэісты. Тут можна паглыбіць свае духоўныя пазнанні, знайсці адказы на пытанні аб веры і жыцці Царквы. Таксама запрашаюцца тыя, хто хоча прыняць у каталіцкай парафіі сакрамэнты хросту і шлюбу, рыхтуецца хрысціць дзіця або стаць хросным, а таксама тыя, хто жадае спавядацца і прымаць у каталіцкай царкве святую Камунію. «Школа веры» чакае і тых, хто не бачыць сэнсу жыцця, хто адзінокі або мае праблемы ў сям’і, хто шукае сваё пакліканне, сустрэчы з Богам.

Дарэчы, касцёл у Рэчыцы з’яўляецца помнікам архітэктуры, ён быў пабудаваны ў 1896-1903 гг. У 1932 г. храм быў зачынены і выкарыстоўваўся як склад, музей, піўны бар. З верасня 1999 года пасля доўгай барацьбы за вяртанне святыні, касцёл зноў належыць супольнасці. Калі яшчэ ў храме быў піўбар, вернікі збіраліся там і маліліся, нягледзячы на ​​гучную музыку і абразы наведвальнікаў бара. Каб прагнаць католікаў з будынку храма, выклікалі міліцыю, якая пры гэтым выкарыстоўвала слёзатачывы газ.

Сімвалічна, што «Школа веры» адкрылася 22 красавіка — гэтая дата шанавалася ў Савецкім Саюзе як дзень нараджэння Леніна, які праводзіў кампанію ваяўнічага атэізму і загадваў забіваць святароў.

Паводле katolik-gomel.by

для друку для друку