- Каталіцкі Веснік - http://catholicnews.by -

У Оршы асвечаны новы касцёл

[1]Парафія Беззаганнага Сэрца Найсвяцейшай Панны Марыі ў Оршы 9 чэрвеня адзначыла вялікую ўрачыстасць — кансэкрацыя новага касцёла. Абрад асвячэння здзейснілі арцыбіскуп Тадэвуш Кандрусевіч, мітрапаліт Мінска-Магілёўскі і біскуп Віцебскай дыяцэзіі Алег Буткевіч.

Парафія Беззаганнага Сэрца Найсвяцейшай Панны Марыі была заснаваная ў 2007 годзе біскупам Уладзіславам Блінам. Спачатку супольнасць пачала збірацца ў вызначаныя гадзіны ў нядзелю ў касцёле Святога Юзафа. Гэта было ўсяго некалькі чалавек, і на працягу тыдня першыя вернікі новай парафіі маліліся пад елкай. Гэта гістарычнае месца для парафіян. Незалежна ад надвор’я, яны былі тут кожны дзень з ружанцамі ў руках. Спачатку будавалі кожную нядзелю палявы алтар, дзе цэлебравалася Эўхарыстыя. Калі набліжаліся “Дажынкі”, гораду надавалі прыгожы выгляд з нагоды прыезду вялікіх гасцей, ксяндзу Здзіславу Петрашэўскаму ўдалося паставіць гараж. На працягу многіх гадоў змяняліся святары, а людзі чакалі будынку касцёла.

У 2009 годзе ў парафію Беззаганнага Сэрца Марыі быў накіраваны малады святар кс. Валеры Орсік. Ён адразу працягнуў працу мінулых пробашчаў у справе пабудовы «святыні» ў сэрцах вернікаў. А праз тры гады свайго служэння ў парафіі распачынае ўзвядзенне новага цаглянага будынка касцёла. Падмурак закладзены, сцены ўжо напалову ўзведзены і 28 чэрвеня 2014 года біскуп Алег Буткевіч здзяйсняе асвячэнне вуглавога каменя і закладку капсулы. А ўжо праз чатыры гады адбываецца асвячэнне новай святыні.

[2]

28 чэрвеня 2014 года

[3]

28 чэрвеня 2014 года

На ўрачыстасць у Оршу з’ехаліся святары і вернікі з розных парафій амаль усіх дыяцэзій Беларусі. Цікава, што сам касцёл ад раніцы быў зачынены. Урачыстасць распачалася працэсіяй літургічнай службы і святароў ад капліцы да новай святыні. Прадстаўнікі парафіі ўручылі арцыбіскупу Тадэвушу і біскупу Алегу сімвалічны ключ, пасля чаго іерархі тройчы стукнуўшы ім у дзверы, запрасілі сабраных увайсці ў Божы дом.

[4]

Асвячэнне касцёла пачалося малітвай і акрапленнем сцен святой вадой, якое здзейсніў мітрапаліт. Прамаўляючы Божае слова арцыбіскуп Тадэвуш на самым пачатку выказаў шчырую падзяку ўсім тым, хто прычыніўся да пабудовы касцёла: біскупу на пенсіі Уладзіславу Бліну, які своечасова прачытаў знакі часу і заснаваў у горадзе другую парафію ў Оршы, Віцебскаму біскупу Алегу Буткевічу, пробашчу кс. Валерыю Орсіку, на чые плечы лёг увесь цяжар будаўнічых прац, дзяржаўным уладам, праектным арганізацыям, спонсарам, будаўнікам і вернікам.

[5]

Пасля казання хор з Магілёва, які ўпрыгожваю сваім спевам урачыстую Літургію, заспяваў Літанію да ўсіх святых. Абрад асвячэння святыні працягнуўся памазаннем алтара і сцен святым алеем. Арцыбіскуп Тадэвуш і біскуп Алег намасцілі алтар і сцены, пазначаючы іх знакам крыжа. Намашчэнне азначае прыналежнасць Богу. Касцёл Беззаганнага Сэрца Найсвяцейшай Панны Марыі ў Оршы з’яўляецца святой будовай і належыць ужо толькі Госпаду.

[6]

Затым было запаленае кадзіла і духмяны водар напоўніў касцёл. Мітрапаліт Мінска-Магілёўскі прайшоў праз святыню, акаджваючы яе і прысутных людзей. Дым кадзіла сімвалізуе малітвы вернікаў, якія будуць узносіцца ў новаасвечанай святыні.

Пасля акаджвання арцыбіскуп Тадэвуш Кандрусевіч перадаў запаленую свечку пробашчу парафіі кс. Валерыю Орсіку, каб запаліць свечкі на сценах касцёла. Святло было запаленае ва ўсім храме.

[7]

На заканчэнне малітоўнай часткі ўрачыстасці, словы ўдзячнасці за новую святыню, за яе асвячэнне і супольную малітву прадстаўнікі парафіі, моладзь і дзеці скіравалі іерархам, святарам, якія распачыналі гэтую справу, якія падтрымлівалі сваімі ахвяраваннямі і малітвамі, прадстаўнікам мясцовай улады, ахвярадаўцам, парафіянам і кожнаму, хто прыехаў раздзяліць радасць з аршанцамі ў гэты дзень. Дзякуючы працавітасці, салідарнасці, падтрымцы ўсіх гэтых людзей, будаўніцтва другога касцёла ў Оршы стала магчымым.

[8]

Ксёндз Валерый уручыў падзякі прысутным біскупам і святарам тых парафій, вернікі якіх дапамаглі сваімі “цаглінкамі”-ахвяраваннямі ў будове новай святыні.

Затым мітрапаліт зачытаў Дэкрэт асвячэння парафіяльнага касцёла ў гонар Беззаганнага Сэрца НПМ у горадзе Орша, які перад усімі прысутнымі падпісалі арцыбіскуп Тадэвуш Кандрусевіч, біскуп Віцебскі Алег Буткевіч, канцлер Віцебскай дыяцэзіі кс. Віктар Місевіч і пробашч кс. Валерый Орсік.

[9]

Працяг святкавання адбыўся на прыкасцельным пляцы разам з музыкамі гурта “Recha”.

Вялікі фотарэпартаж можна паглядзець тут>> [58]

Марына Сінкевіч, тэкст і фота