Святы Айцец зацвердзіў тэму наступнага Сінода Біскупаў

7 сакавіка ў Ватыкане агучылі тэму наступнай сінадальнай асамблеі. Яе зацвердзіў Папа Францішак пасля кансультацый з Генеральным сакратарыятам і Звычайнай радай.

Святы Айцец склікае XVI Звычайную Генеральную Асамблею Сінода Біскупаў на кастрычнік 2022 года. Яе тэма будзе гучаць так: “На карысць Касцёла сінадальнага – камунія, удзел і місія”. Аб гэтым паінфармаваў у адмысловым паведамленні Генеральны сакратар Сінода Біскупаў, кардынал Ларэнца Балдзісэры.

6-7 лютага 2020 года ў Ватыкане праходзіла першае пасяджэнне XV Звычайнай рады Генеральнага сакратарыята Сінода Біскупаў. На ім аналізавалася магчымая тэматыкі наступнай Асамблеі. Базай для гэтага сталі вынікі кансультацый, праведзеных з біскупскімі канферэнцыямі, Сінодамі Усходніх Каталіцкіх Цэркваў, дыкастэрыямі Рымскай курыі і радамі вышэйшых манаскіх настаяцеляў. Пасля завяршэння пасяджэння Пантыфіку была прадстаўлена праблематыка для канчатковага зацвярджэння сінадальнай тэмы.

Беларуская рэдакцыя Vatican News