- Каталіцкі Веснік - http://catholicnews.by -

Ранішнюю Імшу ў Тракелях адправілі ксяндзы-новапрэзбітары

IMG_4197 [1]На ранішняй святой Імшы 11 ліпеня ў Тракелях ксяндзы дзякавалі Богу за дар святарства.

Цэлебраваў Святую Імшу дапаможны біскуп Гродзенскай дыяцэзіі Юзаф Станеўскі. Набажэнства сваім спевам упрыгожыў хор з Ліды (Фары).

Каля алтара Пана прысутнічалі святары: кс. Ян Гавэцкі, які працуе ў Іўі. Ён дзякаваў за 25 год святарскага служэння. Кс. Чэслаў Ладыка, які 13 чэрвеня ў Пінску прыняў прэзбітэрскае пасвячэнне з рук біскупа Пінскага Антонія Дзям’янкі. Малады святар будзе працаваць на Піншчыне.

27 чэрвеня ў гродзенскай катэдры адбыліся святарскія пасвячэнні, якія ўдзяліў біскуп Гродзенскі Аляксандр Кашкевіч. Сёння ў Тракелях новапасвечаныя святары Юрый Садоўскі з Астраўца, Дзмітрый Папянюк з Дзярэчына і Віталій Пяткевіч з Ашмян таксама дзякавалі за дар святарства. Былі і святары, якія ў лістападзе атрымалі пасвячэнне: кс. Павел Раманоўскі і кс. Аляксандар Вараб’ёў.

У гаміліі біскуп Юзаф Станеўскі адзначыў, што ў Касцёле шмат міністрантаў, якія моляцца, ходзяць у пілігрымкі, але мала адважных — тых, хто скажа «так» Хрысту. Іерарх гаварыў аб тым, што Езус, хочучы быць з людзьмі, устанавіў святарства. Праз святароў Бог праводзіць дыялог з чалавекам.

Біскуп пажадаў кожнаму святару быць дарогай, праз якую можна прыйсці да Госпада.

На заканчэнне новапасвечаныя святары намашчанымі далонямі ўдзялілі вернікам бласлаўленне.

Ірына Грэйць, тэкст

Марына Сінкевіч, фота