У беларускім Брэсце ўсталююць помнік Бібліі, аб’яўлены адкрыты конкурс на распрацоўку эскізнага праекта. Помнік будзе прысвечаны выдадзенай у 1563 годзе Брэсцкай Бібліі. Ініцыятыва прымеркавана да 500-годдзя беларускага кнігадрукавання, якое адзначаюць у 2017 годзе.
Помнік Брэсцкай бібліі плануецца ўсталяваць у абласным цэнтры на скрыжаванні вуліц Пушкінская і Кірава, паблізу абласной бібліятэкі імя Горкага, паведамляе Брэсцкі аблвыканкам.
Брэсцкая біблія, выдадзеная на польскай мове, — самае вялікае па аб’ёме друкаванае выданне ХVI-ХVIІІ стагоддзяў Вялікага Княства Літоўскага, шэдэўр паліграфічнага мастацтва эпохі Рэнесансу. Яна была надрукаваная ў берасцейскай друкарні канцлера Вялікага княства Літоўскага і берасцейскага старасты Радзівіла Чорнага.
Прыём заявак на конкурс будзе праходзіць да 12 чэрвеня, да ўдзелу запрашаюць як беларускіх, так і замежных аўтараў. Пераможцу чакае грашовая прэмія ў 40 базавых велічынь (920 рублёў). Работы павінны быць выкананы на лістах фармату А3 ці А4 і дапоўнены аб’ёмна-прасторавай мадэллю, выкананай з любога матэрыялу. Эскізы неабходна накіроўваць на адрас упраўлення культуры Брэсцкага аблвыканкама (224005, Рэспубліка Беларусь, Брэст, вул. Камуністычная, 1).
Помнікі Бібліі ўжо ўсталяваны ў некаторых хрысціянскіх краінах, у прыватнасці, у Бразіліі і ва Украіне. У суседняй з Беларуссю краіне помнік Бібліі з’явіўся яшчэ ў 2001 годзе ў Ровенскай вобласці на пастаменце, дзе ў савецкі час стаяў манумент Леніна.
для друку