[1]18 ліпеня ў будынку Канферэнцыі Каталіцкіх Біскупаў у Беларусі ў Мінску адбыўся першы тур уступнага экзамена для кандыдатаў на першы год навучання ў Вышэйшых духоўных семінарыях у Гродне і ў Пінску, паведамляе Catholic.by [2].
Экзаменацыйныя пытанні датычыліся Катэхізісa Каталіцкага Касцёла, жыцця Паўсюднага і лакальнага Касцёла, яго структуры з мэтай лепш ацаніць зацікаўленасць кандыдатаў тым, як жыве Касцёл. Акрамя таго, кандыдатам трэба было растлумачыць матывы свайго выбару следаваць за Хрыстом, які кліча іх да працы ў Хрыстовай аўчарні ў якасці святароў.
Экзамен прымала экзаменацыйная камісія ў складзе:
- Старшыня камісіі — біскуп Аляксандр Яшэўскі SDB, старшыня камісіі па справах фармацыі семінарыстаў і святароў пры Канферэнцыі Каталіцкіх Біскупаў у Беларусі;
- ксёндз Віталій Вайцяхоўскі, рэктар Вышэйшай духоўнай семінарыі ў Гродне;
- ксёндз Мікалай Ціхановіч, біскупскі вікарый па справах паклікання і семінарыстаў Віцебскай дыяцэзіі;
- ксёндз Павел Эйсмант, куратар 1-га курсу.
З важнай прычыны падчас першага туру адсутнічаў прадстаўнік Пінскай дыяцэзіі, які таксама быў прызначаны ў склад экзаменацыйнай камісіі.
Пасля пісьмовай часткі экзамена кандыдаты сустрэліся з адным з членаў камісіі на кваліфікацыйнай размове.
[3]
Экзаменацыйная камісія, праінфармаваўшы пра сваё рашэнне кожнага дыяцэзіяльнага біскупа, з чыіх дыяцэзій паходзяць кандыдаты, і атрымаўшы іхняе благаслаўленне і згоду, паведамляе, што новымі навучэнцамі семінарыі ў Гродне сталі:
Гродзенская дыяцэзія:
- Марцін Лудзіч (парафія Божага Цела, Крамяніца)
- Дзмітрый Роўны (парафія Унебаўзяцця Найсвяцейшай Панны Марыі, Новы Двор)
- Павел Таўкінь (парафія Імя Найсвяцейшай Панны Марыі, Мураваная Ашмянка)
Мінска-Магілёўская архідыяцэзія:
- Павел Леановіч (парафія Беззаганнага Зачацця Панны Марыі, Бабруйск)
Віцебская дыяцэзія:
- Антон Тышко (парафія Святой Тройцы, Глыбокае)
- Андрэй Януль (парафія Божай Міласэрнасці, Пагошча)
Новым навучэнцам семінарыі ў Пінску стаў:
- Аляксей Заічанка (парафія Св. Карла Барамея і Св. Бэнэдыкта, Пінск).
Другі тур уступнага экзамену ў Вышэйшыя духоўныя семінарыі ў Гродне і Пінску адбудзецца 13–14 жніўня па адрасе: г. Мінск, вул. Кальцова, 153.
Усіх зацікаўленых сардэчна запрашаем на ўступны экзамен у жніўні і просім усіх людзей добрай волі аб малітве ў інтэнцыі новых і святых пакліканняў да святарства.
Аляксандра Шчыглінская, фота