Турма павінна быць “майстэрняй гуманнасці і надзеі”, а не толькі месцам пакарання, падкрэсліў Папа падчас сустрэчы з персаналам рымскай турмы “Regina Coeli”, якая 7 лютага 2019 г. прайшла ў Ватыкане.
Пантыфік заўважыў, што праца на карыць зняволеных “патрабуе ўнутранай сілы, настойлівасці і ўсведамлення асаблівасці місіі”, а таксама “здаровага сэнсу ў розных сітуацыях”.
Паводле Францішка, турма “гэта месца, дзе ўсе — пенітэнцыярная паліцыя, капеланы, выхавальнікі і валанцёры — пакліканы да рэалізацыі складанага задання – клапаціцца пра раны тых, хто па прычыне зробленых памылак быў пазбаўлены асабістай свабоды”.
Папа заўважыў, што недахоп персаналу і “хранічная перанаселенасць” у турмах прыводзіць да таго, што праца тут з псіхалагічнага пункту гледжання вельмі складаная. Турэмны персанал, аднак, не толькі павінен гарантаваць унутраны парадак, але і клапаціцца пра людзей, з якімі сустракаецца штодзённа.
“Ніхто не можа асуджаць іншага чалавека за памылкі, якія той учыніў, а тым больш прычыняць пакуты, прыніжаючы чалавечую годнасць. Неабходна, каб турмы станавіліся ўсё больш і больш гуманнымі. Аднак, балюча чуць, што часта яны ўспрымаюцца як месцы насілля і незаконнасці, дзе пануе чалавечая злосць”, — заўважыў Пантыфік.
Францішак падкрэсліў, што часта зняволеныя з’яўляюцца людзьмі беднымі, якія не маюць ніякай падтрымкі і магчымасці бараніць свае правы, якіх грамадства ўспрымае як непатрэбны цяжар. У гэтым кантэксце ён пажадаў, каб турмы станавіліся месцамі “абнаўлення, уваскрашэння і перамены жыцця”.
“З майго боку, я буду суправаджаць вас маёй любоўю і малітвай, каб маглі вашай працай садзейнічаць ператварэнню турмы, месца пакарання і пакут, таксама ў майстэрню гуманнасці і надзеі”, — завяршыў сваю прамову Пантыфік.
Беларуская рэдакцыя Vatican News
для друку