Папа Францішак правядзе малітву на Ружанцы ў Ватыкане

У суботу, 30 мая 2020 года, у Ватыканскіх садах Святы Айцец узначаліць малітву Ружанца. Дзякуючы прамой трансляцыі ватыканскіх СМІ, будзе створаны тэлемост з марыйнымі санктуарыямі ва ўсім свеце.

Набажэнства арганізуе Папская рада па новай евангелізацыі. Падчас яго будзе наладжана сувязь з найбуйнейшымі санктуарыямі: у Еўропе – з французскім Лурдам, партугальскай Фацімай, італьянскімі Сан-Джавані Ратонда і Пампеямі, а таксама польскай Чэнстаховай; у Злучаных Штатах – з Вашынгтонам; у Афрыцы – з нігерыйскім Элеле і Ямусукра ў Кот-д’Івуары; у Лацінскай Амерыцы – з мексіканскім Гвадэлупэ, калумбійскім Чыкінкіра і Луханам і Мілагра ў Аргентыне.

Асобнымі дзясяткамі Ружанца будуць маліцца прадстаўнікі розных груп, якія асабліва пацярпелі ад каронавіруса: урач і медсястра; вылечаны і той, хто страціў члена сям’і; святар, бальнічны капелан і законніца; фармацэўт і журналіст; валанцёр грамадзянскай абароны са сваёй сям’ёй; маладая сям’я, у якой нарадзілася дзіця ў гэты час, знак надзеі і перамогі жыцця над смерцю, — паінфармавала Папская рада па новай евангелізацыі.

Традыцыю завяршаць май ружанцовай малітвай ля Лурдскага грота, размешчанага ў Ватыканскіх садах, увёў у 1979 годзе св. Ян Павел ІІ.

Беларуская рэдакцыя Vatican News

для друку для друку