Пантыфік напісаў ліст да іспанскага падлетка-пілігрыма

Францішак напісаў ліст 15-гадоваму Альвара Кальвэнтэ з Іспаніі: падлетак з ментальнай інваліднасцю здзейсніў пілігрымку, прайшоўшы Шляхам св. Якуба.

Бацька, які спадарожнічаў юнаку, у лісце паведаміў пра гэта Пантыфіку, і той павіншаваў і падзякаваў Альвара за мужнае сведчанне веры.

“У разгар пандэміі, якую мы перажываем, шчырасцю, радасцю і прастатой ты здолеў нарадзіць надзею ў многіх людзях”, — напісаў Папа падлетку, ураджэнцу іспанскай Малагі.

“Дарагі Альвара, я атрымаў ліст ад твайго бацькі, які паведаміў мне, што ты прайшоў Шляхам св. Якуба, узяўшы ў заплечнік не толькі асабістыя малітоўныя патрэбы, але і просьбы многіх іншых людзей, якія ядналіся з табой у пілігрымцы, просячы аб малітве”, — гаворыцца ў лісце Пантыфіка, апублікаваным на сайце дыяцэзіі Малага.

“Ты пайшоў у пілігрымку і запрасіў многіх людзей зрабіць тое ж, заклікаючы іх не баяцца і аднавіць радасць, таму што ў дарозе мы не адны, Пан заўсёды ідзе побач з намі. Дзякую табе за сведчанне і малітву”, — напісаў Святы Айцец, завяршаючы ліст благаслаўленнем.

Сёмы з дзесяці дзяцей у сям’і Кальвэнтэ, Альвара з’яўляецца членам супольнасці Неакатэхуменальнага шляху. Нягледзячы на сваю інваліднасць, падлетак актыўна ўдзельнічае ў жыцці супольнасці, а яго радасны досвед веры з’яўляецца сведчаннем для ўсіх, хто побач, адзначаецца на дыяцэзіяльным сайце.

Беларуская рэдакцыя Vatican News

для друку для друку