Каталіцкі Веснік Добрая Вестка ў тваім доме!
Фундаментам хрысціянскага жыцця з’яўляецца Езус Хрыстус, які моліцца за нас перад абліччам Айца, адзначыў папа Францішак 28 кастрычніка падчас ранішняй Эўхарыстыі ў Ватыкане.
Аналізуючы ўрывак з Евангелля паводле св. Лукі (Лк 6, 12-19), Пантыфік падкрэсліў, што краевугольным каменем хрысціянскага жыцця з’яўляецца Езус у малітве. “Езус узышоў на гару маліцца і правёў ноч у малітве да Бога”, — гаворыцца ў Святым Пісанні. Толькі пасля гэтага, нагадаў Францішак, адбываецца ўсё іншае: выбар апосталаў, аздараўленні хворых, барацьба са злымі духамі. “Езус маліўся і працягвае маліцца за Каталіцкі Касцёл. Краевугольны камень Касцёла – гэта Пан перад Айцом, які заступаецца, моліцца за нас”, — сказаў Францішак.
Кожны раз, перш чым здзейсніць цуд, Езус моліцца, звярнуў увагу Святы Айцец і прывёў у якасці прыкладаў сцэны Апошняй вячэры, уваскрашэння Лазара, малітвы на гары Аліўнай, нарэшце, смерці на крыжы. “Жыццё Езуса скончылася ў малітве”, — сказаў Францішак.
“Кожны з нас можа сказаць: я ўпэўнены, што Езус моліцца за мяне; вось Ён перад абліччам Айца і ўзгадвае маё імя”, — дадаў Папа. “Паразважаем над выпадкам, які меў месца перад мукамі Пана, калі Езус звярнуўся да Пятра са словамі: “Сымоне, Сымоне, вось сатана дамагаўся прасеяць вас, як пшаніцу, але Я папрасіў за цябе, каб не знікла твая вера” (Лк 22, 31). “Тое, што Езус кажа Пятру, кажа кожнаму з нас”, — запэўніў Пантыфік.
“Гэтая думка надае ўпэўненасці. Я належу да гэтай супольнасці, устойлівай, бо яе краевугольным каменем з’яўляецца Езус, Езус, які моліцца за мяне, за нас”, — сказаў Папа і заклікаў паразважаць над гэтай таямніцай Касцёла.
для друку
