Нядзельны адпачынак глыбоцкіх міністрантаў

Вялікі пост — гэта час не толькі малітвы, адрачэння ад ежы ці звычак; гэта таксама асаблівы час, каб упарадкаваць сваё жыццё, прымірыцца з непрыяцелямі, прысвяціць час родным, блізкім і сябрам.

У нядзелю, 18 лютага, прыняўшы ўдзел у святой Імшы, малодшыя міністранты з парафіі Святой Тройцы ў Глыбокім пасля абеду накіраваліся на супольны адпачынак на свежым паветры. Разам з вікарыем кс. Іванам Кароткіным, с. Ганнай Блышко і сваімі роднымі накіраваліся на машынах за горад на вялікую горку, каб у прыгожы снежны і сонечны дзень пакатацца з гары на цюбінгах.

Дзве з паловай гадзіны — гэта быў час не толькі на радасць дзяцей, шчырыя ўсмешкі і ружовыя шчокі, але час татам у вольны ад працы дзень проста пабыць разам з дзецьмі, час на ўзаемную дапамогу старэйшых малодшым падняцца на гару, арганізаваць бяспечны спуск.

Знайдзіце момант пабыць з роднымі ў гэты Вялікі пост, удзяліце дзецям свой вольны час, патэлефануйце знаёмым!

Марына Сінкевіч

для друку для друку