- Каталіцкі Веснік - http://catholicnews.by -

На «Міждыяцэзіяльных курсах сямейнага жыцця» у Гродне распачаўся новы навучальны год

[1]20 кастрычніка ў гродзенскай парафіі Найсвяцейшага Адкупіцеля (Дзевятоўка) прайшло адкрыццё новага навучальнага года на «Міждыяцэзіяльных курсах сямейнага жыцця».

З гэтай нагоды ў парафіяльным касцёле адбылася ўрачыстая святая Імша. У гаміліі сакратар Рады па справах сям’і пры Канферэнцыі Каталіцкіх Біскупаў у Беларусі а. Пётр Фраштэнга OCD засяродзіў увагу на тэме «Што значыць вызнаваць Езуса Хрыста?».

Пасля Імшы навучэнцы курсаў праслухалі інаўгурацыйны даклад а. Пятра Фраштэнгі на тэму «Вучэнне Касцёла адносна працы і святкавання нядзелі ў сям’і».

Выступоўца ўзгадаў, што на гэту тэму кажуць дакументы Каталіцкага Касцёла, каб паказаць сэнс хрысціянскага святкавання і патлумачыць, як гэта выглядае ў жыцці. Святар адзначыў: «Касцёл заўжды клапаціўся і надалей клапоціцца пра чалавека. Як святкаванне, так і праца даюць магчымасць існаваць хрысціянскім сем’ям у грамадстве». Святар нагадаў і вучэнне св. Яна Паўла II, якi ў сваiх дакументах таксама звяртаў вялікую ўвагу на гэтую справу.

Кажучы: «Не бойцеся ахвяраваць свой час для Хрыста», Ян Павел ІІ заклікае, «каб супакой і радасць Уваскрослага Пана праяўлялася ў звычайных здарэннях жыцця». На практыцы гэты заклік рэалізуецца праз малітву, чытанне Святога Пісання і духоўнай літаратуры, сумесны адпачынак у сям’і, — усё тое, што ўмацоўвае нас у веры, надзеі і любові, адзначыў а. Пётр Фраштэнга.

Святар дадаў, што «святкаванне нядзелі, якую называюць “Пасхай тыдня”, з’яўляецца не проста ўспамінам факта ўваскрасення Езуса, але і “святкаваннем жывой прысутнасці Уваскрослага сярод вернікаў”» (Dies Domini, 31).

«Эўхарыстыя – сэрца нядзелі», — падкрэсліў дакладчык. Па яго словах, «кожная супольнасць, якая збірае сваіх членаў на “ламанні хлеба”, усведамляе, што яна з’яўляецца месцам, дзе выразна выяўляецца таямніца Касцёла».

[1]

Пасля дакладу адбылася дыскусія на тэмы, закранутыя ў ім. Былі зададзены наступныя пытанні:

Прынята, што ў нядзелю нельга шыць, вязаць. Для некаторых, напрыклад, вязанне — гэта адпачынак. Ці можна займацца такога роду адпачынкам у нядзелю ці ўсё ж такі гэта грэх?

Тут варта звярнуць увагу не столькі на само дзеянне, колькі на яго мэту, ад якой і будзе залежаць наяўнасць граху. Напрыклад, вязаць для продажу — грэх.

Ці можна хадзіць на рынак і ў басейн у нядзелю?

Па словах дакладчыка, «шопінг, наведванне разнастайных месцаў не з’яўляецца працай, але варта памятаць пра тое, што, наведваючы такія месцы, мы карыстаемся з працы іншых людзей — таксама хрысціян. І праблема тут у тым, што гэтыя хрысціяне працуюць толькі таму, што іх браты і сёстры найчасцей наведваюць гэтыя месцы (рынкі, кафэ і г.д.) менавіта ў нядзелю, а, як вядома, сфера абслугоўвання жыве на падставе прынцыпу: попыт нараджае прапанову. Таму наведванне вышэй узгаданых месцаў з’яўляецца саўдзелам у граху і схіленнем да яго».

Ці можна прасаваць? Ці можна карыстацца пральнай машынай у нядзелю?

Дакладчык адзначыў, што гэтыя пытанні адносяць нас да звычыйнай разважлівасці, калі мы загадзя плануем свае дзеянні. Таму такая праца, якую можам зрабіць у іншы час, але пакідаем на нядзелю, будзе грахом — занядбаннем.

Па словах святара, «хутчэй гэта залежыць ад таго, як тое ці іншае дзеянне ўплывае на нашыя адносіны з Богам». Ён падкрэсліў, што належыць устрымлівацца ад тых прац і заняткаў, якія перашкаджаюць адпраўленню культу Бога і належнаму духоўнаму і цялеснаму адпачынку. Варта памятаць, што кожная сітуацыя індывідуальна.

Даведка:

«Міждыяцэзіяльныя курсы сямейнага жыцця» ў Гродне былі заснаваны дэкрэтам Канферэнцыі Каталіцкіх Біскупаў у Беларусі ў 2009 г. Непасрэдную адказнасць за іх нясе Рада па справах сям’і пры ККББ.

Iрына Мялешка, grodnensis.by [2]