Мёры ў шаснаццаты раз правялі “Зорку Бэтлеему” (+відэа)

Такую назву носіць конкурс каляднай песні, які традыцыйна ладзіць Мёрская парафія.

У гэтым годзе мерапрыемства адбылося ў сераду, 3 студзеня ў Мёрскім раённым Доме культуры.

Арганізатарам гэтага штогадовага конкурсу з’яўляецца ксёндз Кшыштаф Мянкіна, мясцовы пробашч. Ужо ад самай раніцы ў Мёры сталі прыбываць маладыя таленты з розных куткоў Віцебскай дыяцэзіі. Усяго ў гэтым годзе ў конкурсе прынялі ўдзел прадстаўнікі дванаццаці парафій, а калі ўлічыць тую акалічнасць, што ў Паставах ужо дзве каталіцкія парафіі, то можна сцвярджаць, што ў Мёрах прысутнічалі трынаццаць прадстаўнікоў.

Ганаровымі гасцямі фестывалю ў гэтым годзе сталі біскуп Віцебскай дыяцэзіі Алег Буткевіч і канцлер дыяцэзіі ксёндз Віктар Місевіч. Ксёндз Віктар у гэтым годзе ўзначаліў журы, у склад якога ўвайшлі таксама выкладчык музыкі Галіна Грабоўская і мастачка Вольга Чарняўская. Для святара гэта быў дэбют на пасадзе кіраўніка журы, але ён годна з гэтым справіўся.

Самай эмацыйнай часткай праграмы было ўручэнне дыпломаў і аб’яўленне вынікаў. Журы нікога не пакінула без падарункаў і прызоў. А як жа інакш? Гэта дзеці, якія могуць і пакрыўдзіцца, калі ім не ўдзяліць належнай увагі.

Таму былі вызначаныя тры прызы глядацкіх сімпатый, тры трэція месцы, тры другія і тры першыя.

Прызы глядацкіх сімпатый атрымалі Крысціна Багушэвіч і Андрэй Малатоўнік з Варапаева, Маша Шаура з Паставаў і Дзіяна Гуйдо з Наваполацка.

Трэція месцы дасталіся гурту віяланчэлістаў з Бешанковічаў, фальклорнаму гурту з Мёраў і Паліне Сіняўскай з Глыбокага.

Другія месцы падзялілі Сафія Пацянкоўская з Верхнядзвінску, гурт “Ex anima” з Браслава і Мікіта Рабухін з Паставаў.

Лепшымі сталі гурт “Музыкі Хрыста” з Шаркаўшчыны, Злата Ярашэвіч з Лучая і Анастасія Пазняк і Антон Анецько з Мёраў. Пераможцы атрымалі гітары. А напрыканцы ад дабрачыннага каталіцкага таварыства “Карытас” усе ўдзельнікі атрымалі салодкія падарункі.

А Мёры развіталіся з удзельнікамі і гасцямі свята да наступнага года.

Зміцер Лупач, тэкст
Марына Сінкевіч, фота
Леанід Юрык, відэа

Выступленні:
Злата Ярашэвіч (Лучай)
«Музыкі Хрыста» (Шаркаўшчына)
Анастасія Пазняк і Антон Анецько (Мёры)

для друку для друку