Ліст на семінарыйную нядзелю

rylkoЛіст на семінарыйную нядзелю

Урачыстасць Хрыста Валадара Сусвету

ад супольнасці Міждыяцэзіяльнай

вышэйшай духоўнай семінарыі імя св. Тамаша Аквінскага ў Пінску

Паважаны Ксёндз Пробашч! Дарагія вернікі!

Умілаваныя ў Хрысце браты і сёстры!

Урачыстасць Хрыста Валадара Сусвету ў Касцёле на Беларусі з’яўляецца асаблівым днём малітвы за клерыкаў і ўсіх пакліканых да Божай службы. Гэта таксама дзень збору ахвяраванняў на патрэбы духоўнай семінарыі.

Ужо стала добрым звычаем, што менавіта ў гэты дзень супольнасць студэнтаў і фарматараў Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску наведвае парафіі Мінска-Магілёўскай архідыяцэзіі, Пінскай і Віцебскай дыяцэзій, каб непасрэдна сустрэцца з кожнай парафіяльнай супольнасцю і выказаць словы глыбокай удзячнасці за духоўныя і матэрыяльныя дары для гэтай фармацыйнай установы, дзе ўзрастаюць у ласцы паклікання будучыя святары.

У сувязі з тым, што мы не маем фізічнай магчымасці наведаць усе парафіяльныя супольнасці, каб асабіста падзякаваць кожнаму пробашчу і кожнаму верніку за малітву і ахвяру, хочам праз гэты ліст звярнуцца да Вас са словамі глыбокай удзячнасці за Вашы незлічоныя духоўныя дары і матэрыяльную падтрымку, а таксама запэўніць у нашай штодзённай малітоўнай памяці пра Вас.

Міждыяцэзіяльная вышэйшая духоўная семінарыя ў Пінску рыхтуе будучых святароў для трох дыяцэзій на Белаурсі: Мінска-Магілёўскай, Віцебскай і Пінскай. Яна ўтрымліваецца выключна з ахвяраванняў вернікаў.  Ад моманту заснавання Слугой Божым Біскупам Зыгмунтам Лазінскім у 1925 г. гэтая духоўная навучальная ўстанова лічыць ужо 91 год, хаця фармацыйнай пляцоўкай сцены семінарыі як найстарэйшага з захаваных на Беларусі каталіцкіх кляштараў служылі ад XIV стагоддзя. У 1939 г. дзейнасць семінарыі была перарваная спачатку з-за ваенных ліхалеццяў, а пасля па прычыне ваюючага атэізму. Аднак фармацыйная праца не спынялася. Выхаваўцы і выпускнікі нашай семінарыі здолелі пацвердзіць сваю пастырскую адданасць Богу, Касцёлу і святарскаму пакліканню ахвярна працуючы аж да праліцця крыві і аддаючы жыццё за Хрыста, як гэта сталася з першым Рэктарам семінарыі Кс. Вітальдам Івіцкім, які паўтарыў мучаніцкі подзвіг святога Максімільяна Кольбэ. Семінарыя ў Пінску выхавала вялікіх сыноў нашага Касцёла, такіх як благаслаўлёны ксёндз Мечыслаў Багаткевіч, Слуга Божы ксёндз Аляксандр Зянкевіч, Сведка веры Кардынал Казімір Свёнтэк, а таксама шматлікіх іншых ахвярных пастыраў.

У гэтым годзе мы таксама ўзгадваем святой памяці ксяндза інфулата Вацлава Пянткоўскага, які 25 год таму адышоў у вечнасць. Пасля заканчэння нашай духоўнай семінарыі і абароны доктарскай дысертацыі ў Рыме ў канцы 1930-х ён служыў у ёй віцэ-рэктарам. У часы атэістычных пераследаў, пасля вызвалення са сталінскіх лагераў, ён быў пробашчам у Мядзведзічах (каля Баранавічаў) і кіраваў у адсутнасць біскупа Пінскай дыяцэзіяй. Ксёндз Пянткоўскі здолеў нават у часы ганенняў аднавіць і працягнуць традыцыі нашай семінарыі рыхтуючы да святарства наступнае пакаленне душпастыраў, з якіх двое служаць сёння як біскупы.

Сёлета мы дзякуем Пану Богу за 15-год адраджэння Духоўнай семінарыі ў Пінску ў якасці міждыяцэзіяльнай. Бог у сваіх спрадвечных намерах даў ласку аднаму з апошніх перадваенных выхаванцаў семінарыі – Казіміру Свёнтэку стаць кардыналам, архіпастырам, які пасля падзення атэістычнай сістэмы адраджаў Касцёл на Беларусі і сваю родную “Alma Mater” у Пінску. У 2001 годзе семінарыя была нанава адчынена, каб рыхтаваць святароў для трох нашых дыяцэзій.

Ва Урачыстасць Хрыста Валадара Сусвету мы дзякуем кожнаму верніку і душпастыру за малітву і ахвярнасць дзеля падрыхтоўкі будучых святароў. Таксама просім надалей аб падтрымцы, каб праз нашыя сумесныя старанні, малітву, зычлівае слова і канкрэтныя добрыя ўчынкі Міждыяцэзіяльная вышэйшая духоўная семінарыя ў Пінску магла як найлепш працягваць выкананне сваёй адказнай місіі ў падрыхтоўцы будучых пастыраў нашага Касцёла.

Няхай Хрыстус Валадар, Бог Вялікі і Міласэрны (Эф 2, 4-5), адорыць кожнага з Вас шчодрым благаслаўленнем і ласкай.

З глыбокай удзячнасцю і дарам малітвы ад імя супольнасці  Міждыяцэзіяльнай вышэйшай духоўнай семінарыі імя святога Тамаша Аквінскага ў Пінску

Ксёндз Андрэй Рылка, Рэктар

Пінск, 16 лістапада 2016 г.

для друку для друку