Ксёндз Павел Самсонаў: Без Бога не да парога

Гэта народнае выслоўе святар прывёў падчас адкрыцця трактарнага ралі ў вёсцы Парыж Пастаўскага раёна.

Гэта мерапрыемства прайшло на тэрыторыі Пастаўшчыны і Глыбоччыны ў суботу, 28 студзеня, і сабрала больш за чатыры тысячы гледачоў. Арганізатарам ралі выступіў Мінскі трактарны завод.

Ідэя яго правядзення была ўзятая са знакамітага аўтамабільнага ралі “Парыж – Дакар”.

Стартавала ралі ў вёсцы Парыж Пастаўскага раёна. Удзельнікаў мерапрыемства прывітаў кіраўнік Пастаўскага раёна Віктар Гутараў, намеснік дырэктара МТЗ Андрэй Суслянкоў, а таксама капітан каманды “МАЗ-СПОРТаўта” Сяргей Вязовіч. Дарэчы, гэта каманда нядаўна вярнулася са спаборніцтваў “Дакар-2017”, дзе заняла шостае месца, а МАЗ увайшоў у тройку лепшых аўтамабіляў. Прадстаўнікі гэтай каманды прыехалі на спартыўнай машыне, што ўдзельнічала ў сусветна вядомым ралі, каб сваёй прысутнасцю падтрымаць удзельнікаў ралі трактарнага.

Потым удзельнікаў ралі блаславілі праваслаўны і каталіцкі святары. Спачатку выступіў іерэй Георгій Лакотка, настаяцель храма Уваскрэсення Хрыстова з Варапаева, потым ксёндз Павел Самсонаў з Дунілавіч, дзекан Пастаўскага дэканата.

«У нашага народа заўсёды была традыцыя – усе значныя справы пачынаць з малітвы, – адзначыў ксёндз Павел, – бо толькі з Божай дапамогай можна дасягнуць добрых вынікаў. Таму і прыказка такая ёсць у беларусаў: Без Бога не да парога”».

Перад стартам праваслаўны святар акрапіў трактары святой вадой.

Па ўсяму маршруту тэхніку суправаджалі тэлекамеры і квадракоптары. На фінішы ў Мосары ўдзельнікаў ралі віталі тысячы людзей. Прысутнічала тут і прадстаўнічая афіцыйная дэлегацыя, у склад якой уваходзілі Мікалай Шарснёў, кіраўнік Віцебскай вобласці, Уладзімір Цярэнцьеў, старшыня Віцебскага аблвыканкама, Аляксандр Шумілін, старшыня Дзяржкамітэта па навуцы і тэхналогіях, Фёдар Дамаценка, генеральны дырэктар МТЗ, Аляксандр Агароднікаў, намеснік міністра прамысловасці, кіраўнікі Пастаўскага і Глыбоцкага раёнаў Віктар Гутараў і Алег Морхат, іншыя афіцыйныя асобы.

Падчас свайго выступу кіраўнік Глыбоцкага раёна Алег Морхат узгадаў, што гэтае ралі стала магчымым таксама і дзякуючы таму, што больш за дваццаць гадоў тут працаваў ксёндз Юозас Булька, які сваім адданым служэннем даў другое дыханне гэтым мясцінам: «Ён прывіваў любоў да бліжніх, нёс людзям прыгажосць, таму мы спадзяёмся, што гэтае намоленая зямля дасць чарговы штуршок нашаму машынабудаванню.»

Затым адбылося ўручэнне ўзнагарод. Пераможцам першага этапу ралі стаў Руслан Барсук, сярод прадстаўнікоў віцебскага аграпрама пераможцам стаў трактарыст ААТ “Ліпаўцы” Андрэй Мацвееў. Узнагароды атрымалі і іншыя ўдзельнікі ралі.

Арганізатары ралі выказалі спадзяванне, што гэта мерапрыемства стане традыцыйным і ў наступным годзе зноў збярэ ўдзельнікаў і гледачоў.

Зміцер Лупач, тэкст і фота
Леанід Юрык, відэа

для друку для друку