Інвалідны вазок з хлопцам паднялі на руках яго сябры, каб той змог убачыць Папу Францішка

Гэта фота назвалі здымкам дня многія вядомыя выданні.

Кадр, на якім адлюстравана, як Папа Рымскі Францішак дабраслаўляе маладога чалавека на інваліднай калясцы, абляцела свет. Фота было зроблена ў дзень прыбыцця Пантыфіка ў Панаму, дзе праходзяць каталіцкія Сусветныя дні моладзі. Папа Францішак ехаў на папамабілі па вуліцах з аэрапорта, і ў гэты момант сябры хлопца-інваліда паднялі і трымалі на руках калыску з ім, каб юнак змог убачыць Пантыфіка. Гэта заўважыў Святы Айцец, усміхнуўся і блаславіў маладога чалавека.

Узрушаючы здымак выпадкова зрабіў мясцовы вясельны фатограф, паведамляе польскае агенцтва KAI. Ён адразу і не заўважыў, што патрапіла ў кадр, канцэнтруючыся на папамабілі. Не чакаючы вялікага поспеху, фатограф выклаў здымак у свой Instagram, зрабіўшы яго чорна-белым — каб акцэнтаваць увагу на Папу Францішку і хлопцу-інваліду, бо абодва яны былі апранутыя ў белае. За тры дні кадр набраў каля 20 тысяч лайкаў.

Як высветлілася, на фота – 17-гадовы Лукас Энрыкес з прыгарада Панамы. Ён паралізаваны, з-за чаго не можа хадзіць, рухаць адной рукой, а таксама гаварыць. Ён мае зносіны з людзьмі з дапамогай смартфона. Затое часта усміхаецца і адной рукой, якая працуе, іграе на электрааргане. Гадуе хлопца адна маці – бацька памёр год таму.

Паводле Katolik.life

для друку для друку