Даследаванні Плашчаніцы не ўплываюць на яе духоўнае значэнне

Турынская плашчаніца не з’яўляецца прадметам веры, аднак яна дапамагае зразумець, якія пакуты зведаў Езус дзеля збаўлення, адзначыў папскі кусташ.

Так іерарх адрэагаваў на публікацыю ў “Journal of forensic sciences”.

Незалежна ад вынікаў даследаванняў “ніхто не можа адмаўляць відавочнасць таго факту, што сузіранне Плашчаніцы падобна прачытанню старонак Евангелля, якія распавядаюць аб пакуце і смерці Сына Божага на Крыжы. Такім чынам, Турынская плашчаніца, не з’яўляючыся прадметам веры; яна садзейнічае веры”, — сказаў арцыбіскуп Чэзарэ Назілья. Менавіта гэта, перакананы ён, і сёння з’яўляецца прычынай факту, што “мільёны і мільёны вернікаў з усяго свету ўшаноўваюць Плашчаніцу, моляцца каля яе і сузіраюць яе, чэрпаючы надзею для свайго паўсядзённага жыцця”.

У сваю чаргу прафесар Паола Дзі Ладзара, навуковы дырэктар Італьянскага агенцтва новых тэхналогій, энергіі і ўстойлівага эканамічнага развіцця, а таксама намеснік дырэктара Міжнароднага цэнтра вывучэння Турынскай плашчаніцы, заявіў, што даследаванні Бырыні і Гарласкелі ўяўляюць пэўную цікавасць, аднак спосаб правядзення досведаў не мае дастатковых характарыстык для таго, каб іх можна было назваць “пераканаўчымі і аўтарытэтнымі”. Лабараторныя досведы па вывучэнні сыходу крыві з ран чалавека праводзіліся на здаровых валанцёрах ва ўмовах, якія моцна адрозніваліся ад тых, якія адносяцца да Плашчаніцы. Не была ўлічана наяўнасць на скурным покрыве чалавека зямлі, бруду, поту, гематом, а таксама не была ўлічаная ступень вязкасці крыві абязводжанага чалавека. Немагчыма ўзнавіць рэалістычныя ўмовы сыходу крыві ў укрыжаванага чалавека, не ўлічваючы гэтых фактараў, звярнуў увагу італьянскі прафесар.

Ва ўсялякім выпадку, абвешчаныя нядаўна вынікі новага даследавання Турынскай плашчаніцы ніякім чынам не ўплываюць на духоўнае і рэлігійнае значэнне гэтага святога палатна як “іконы пакут і смерці Пана”, падкрэсліў папскі кусташ арцыбіскуп Чэзарэ Назілья.

Беларуская рэдакцыя Vatican News

для друку для друку