Біскупы ЗША супраць вяртання смяротнага пакарання

Каталіцкія біскупы ЗША выступаюць супраць ініцыятывы, абвешчанай адміністрацыяй Дональда Трампа, па аднаўленні выканання вышэйшай меры пакарання на федэральным узроўні.

Старшыня камітэта епіскапату па справах нацыянальнай справядлівасці і чалавечага развіцця, біскуп Франк Дьюэн заклікаў улады адмовіцца ад вяртання да смяротнага пакарання і прыняць да ўвагі вучэнне Касцёла на гэтую тэму.

У спецыяльнай заяве іерарх нагадаў прамову Францішка перад членамі Амерыканскага кангрэсу ў 2015 г., у якой Пантыфік, спасылаючыся на сваіх папярэднікаў, заклікаў да адмены смяротнага пакарання ва ўсім свеце, паколькі “справядлівае і неабходнае пакаранне” не можа “выключаць права на надзею і мэты, якой з’яўляецца выпраўленне”. Біскуп Дьюэн таксама звярнуўся да Катэхізіса Каталіцкага Касцёла, які характарызуе смяротнае пакаранне як напад на непарушнасць і годнасць чалавека.

Біскупы ЗША ўжо 40 гадоў заклікаюць да адмены смяротнага пакарання. Яны выказалі гэта, між іншым, у заяве ад 2005 г. “Культура жыцця і смяротнае пакаранне”.

Старшыня камітэта епіскапату па справах нацыянальнай справядлівасці і чалавечага развіцця заклікаў федэральныя ўлады ўлічваць вучэнне Касцёла, а таксама доказы, якія паказваюць на няправільнае прымяненне смяротнага пакарання, і адмовіцца ад абвешчаных планаў.

Смяротнае пакаранне на федэральным узроўні ў ЗША не выкарыстоўваецца ўжо 16 гадоў. Гэты мараторый, аднак, быў неафіцыйным. Зараз абвешчана аб планах пакараць смерцю ў 2020 г. 5 з 62 федэральных зняволеных, прысуджаных да вышэйшай меры.

Смяротнае пакаранне, якое існавала з пачатку паўстання ЗША, было адменена ў 1972 г. Аднак яго вярнулі праз чатыры гады. Незалежна ад федэральнага ўзроўню, вышэйшая мера выкарыстоўваецца ў 29 з 50 штатаў.

Беларуская рэдакцыя Vatican News

для друку для друку