Анёл-ахоўнік доктара Яцыны – на тэрыторыі докшыцкай бальніцы была асвечаная выява анёла (+відэа)

Асвячэнне адбылося ў сераду, 30 жніўня.

Ідэя ўстаноўкі гэтай выявы належыць урачу Казіміру Яцыну, які ўжо тры гады працуе ў Докшыцах. Падобнага анёла ён таксама ўсталяваў, калі працаваў у глыбоцкай бальніцы.

Сам Казімір Вацлававіч так патлумачыў сутнасць сваёй ідэі:

— Анёл – гэта сімвал таго, што нас яднае з Панам Богам. Каб аддзячыць гэтым людзям, сваім калегам па працы, я вырашыў паставіць помнік як памятку аб тых людзях, што тут працавалі, што зараз працуюць, якія будуць тут працаваць. Падзякаваць Пану Богу за тое, што я тут тры гады адпрацаваў. Каб гэты анёл аберагаў усіх людзей, якія тут працуюць, і хворых, якія тут ляжаць.

Выяву анёла асвяціў пробашч докшыцкай парафіі айцец Андрэй Букштан. На гэту ўрачыстасць сабраліся работнікі бальніцы. Перад тым, як правесці непасрэдна абрад асвячэння, айцец Андрэй звярнуўся да супрацоўнікаў бальніцы. Ён адзначыў, што пакліканне святара і ўрача ў нечым падобнае:

— Заўсёды гэта падабенства ў любові. Бо сутнасцю любові ёсць служэнне іншаму чалавеку. Калі мы збіраемся на бласлаўленне выявы анёлаў, якія створаныя для таго, каб служыць чалавеку, то ў нейкай ступені таксама з’яўляемся анёламі, якія пасланыя да людзей церпячых, людзей хворых, якія патрэбная наша прысутнасць, наша ўсмешка, наша добрае слова, тое, што мы іх можам заўважыць і дапамагчы.

Усе прысутныя разам са святаром і сёстрамі законнымі, што таксама прымалі ўдзел у гэтай урачыстасці, памаліліся літаніяй да анёлаў. Потым айцец Андрэй асвяціў выяву анёла.

Напрыканцы Казімір Яцына падзякаваў усім людзям, хто дапамог яму з ажыццяўленнем яго ідэі. Асабліваю падзяку ён выказаў загадчыку гаспадаркай бальніцы Канстанціну Раслевічу за дапамогу ў ажыццяўленні яго ідэі.

Канстанцін Раслевіч у сваю чаргу адзначыў, што яму ў гэтым дапамагла ахвярнасць нашых людзей, якія гэту ідэю падтрымалі. Таксама ён пажадаў усім не забывацца ў сваім жыцці пра Бога:

— За апошнія два гады ў нас адбыліся дзве падзеі. Першае, гэта ў мінулым годзе ў парку адпачынку для хворых быў усталяваны абраз нябеснага заступніка медыцыны святога Панцелеймона. А ў гэтым годзе вось гэты анёл. Гэта ў першую чаргу заслуга Казіміра Вацлававіча, бо гэта яго ідэя, а мне як загадчыку бальнічнай гаспадаркі прыйшлося гэту ідэю ажыццяўляць. І дай нам, Божа, усім быць з Богам.  

Даволі часта можна пачуць такое меркаванне, што работнікі медыцыны не з’яўляюцца веруючымі людзьмі. Але доктар Яцына з гэтым не згодны:

— Усе ўрачы – гэта глыбока веруючыя людзі. Бо дар лячэння людзей дае чалавеку толькі Бог. І натхненне, і пазнанне, і міласць, і дабрату, і жаданне дапамагчы людзям. Таму я веруючы чалавек, хаджу ў касцёл, малюся Богу.

Будзем спадзявацца, што гэта выява будзе ахоўваць і тых, хто працуе ў гэтай бальніцы, і тых хворых, што будуць звяртацца сюды па дапамогу.

Зміцер Лупач, тэкст і фота
Леанід Юрык, фота і відэа

для друку для друку

Веснік-відэа

Варта паглядзець

Святыя заступнікі