86-гадовая законніца знялася ў спартыўным кліпе [відэа]

Кароткі фільм «Бязмежная маладосць», галоўнай гераіняй якога выступіла каталіцкая законніца з ЗША 86-гадовая Мадонна Бьюдэр, зноў стаў папулярным у сацсетках.

Спартыўны кліп з сястрой Мадонай, зняты кампаніяй Nike, якая спецыялізуецца на вытворчасці спартыўнага адзення і абутку, быў выпушчаны ў жніўні 2016 года да Летніх Алімпійскіх гульняў. Цяпер «вірусны» ролік зноў стаў папулярным, ён набірае ў сацсетках тысячы лайкаў і сотні узнёслых каментароў.

Сястра Мадонна Бьюдэр ўжо даўно знакамітая як «Жалезная манахіня». Яна пачала займацца спортам у 48 гадоў па ўказанні духоўнага айца, які лічыў, што спартыўныя практыкаванні — гэта тонкая налада розуму, цела і духу. Жанчына занялася трыятлонам — гэта адзін з самых складаных аднадзённых відаў спаборніцтваў, які ўяўляе сабой гонку з плавальнага, велагоначнага і бегавога этапаў.

Першы раз Бьюдэр прайшла дыстанцыю трыятлона, калі ёй было 52 гады. У спаборніцтвах Ironman яна пачала ўдзельнічаць у 55-гадовым узросце, паспяхова прайшоўшы дыстанцыю не менш за 45 разоў. «Жалезная манахіня» — найстарэйшая з усіх удзельнікаў спаборніцтваў Ironman, якія калі-небудзь прайшлі ўсю дыстанцыю: яна здолела гэта зрабіць 26 жніўня 2012 года, калі ёй было 82 гады. Гэты сусветны рэкорд ўзросту да гэтага часу нікім не пабіты.

У 2010 годзе сястра Бьюдэр апублікавала аўтабіяграфічную кнігу, у якой распавядае пра сваё жыццё, трыятлон і веру, якая дае ёй сілу.

katolik.life

для друку для друку